Një sulm i rëndë ka ndodhur këtë të enjten, në një tren të shpejtë ICE në Gjermaninë jugore, ku një person ka plagosur katër pasagjerë me një sopatë, para se të ndalohej nga policia.
Sipas autoriteteve, sulmi ndodhi në një tren që udhëtonte nga Hamburgu drejt Vjenës, mes stacioneve Straubing dhe Plattling në Bavari. Policia raportoi se sulmuesi, i cili mund të ketë përdorur edhe armë të tjera, u kap nga pasagjerë të tjerë dhe u plagos gjatë përpjekjes për ta ndaluar.
Zëdhënësi i policisë deklaroi për agjencinë gjermane të lajmeve ‘dpa’ se sulmuesi “ka të ngjarë të jetë plagosur disi më rëndë”. Identiteti dhe motivi i sulmuesit nuk janë bërë publik ende, ndërsa hetimet vazhdojnë.Gjermania ka përjetuar një rritje të sulmeve të dhunshme në hapësirat publike kohët e fundit, duke përfshirë sulme me thikë në stacione treni dhe vende të tjera.
Ky incident vjen pas një sulmi me thikë në stacionin qendror të Hamburgut në maj 2025, ku 18 persona u plagosën, dhe një sulmi tjetër fatal në Mellrichstadt më 1 korrik, ku një person humbi jetën dhe dy të tjerë u plagosën rëndë. Autoritetet po hetojnë me urgjencë për të përcaktuar rrethanat dhe motivin e këtij sulmi të fundit, ndërsa publiku është tronditur nga kjo valë e dhunës.
Edhe Finlanda u trondit nga një sulm me thikë pranë qendrës tregtare Ratina në Tampere, Finlandë, ku disa persona mbetën të plagosur. Incidenti ka ndodhur rreth orës 16:30, dhe sipas raportimeve, policia ka arrestuar një 20-vjeçar si të dyshuar për sulmin.
Nuk dihet ende numri i saktë i të plagosurve apo gjendja e tyre shëndetësore, por një dëshmitar okular ka raportuar për media finlandeze se ka parë kalimtarë duke ofruar ndihmën e parë për dy persona të shtrirë në tokë, në një skenë të mbuluar me gjak.
Policia ka deklaruar se nuk ka më rrezik për publikun dhe po heton motivet e sulmuesit, të cilat mbeten të panjohura. Autoritetet janë duke mbledhur prova dhe pamje filmike nga kamerat e sigurisë për të sqaruar rrethanat e ngjarjes.
