Gjenerali Thierry Burkhard, shefi i ushtrisë franceze, ka deklaruar se Rusia e sheh Francën si armikun kryesor në Evropë, për shkak të mbështetjes së saj të fuqishme ndaj Ukrainës.
Në një konferencë të rrallë për shtyp në Paris, Burkhard tha se rreziku nga Moska është i shumëanshëm dhe përfshin dezinformim, sulme kibernetike, sabotim dhe spiunazh.
“Ishte Vladimir Putin ai që e tha këtë”, shtoi gjenerali, duke iu referuar pohimit se Parisi është kundërshtari kryesor i Kremlinit në kontinent.
Ai paralajmëroi se Rusia ka mjete të ndryshme për të zhvilluar një luftë hibride ndaj Francës: “Në hapësirë, manovrat satelitore ruse synojnë të pengojnë trajektoret tona satelitore, t’i afrohen dhe t’i bllokojnë ato, t’i afrohen dhe t’i spiunojnë.”
Burkhard tha se edhe nëndetëset bërthamore ruse patrullojnë rregullisht Atlantikun dhe Mesdheun për të vëzhguar zonat strategjike të interesit për Francën dhe Britaninë.
“Në ajër ka fërkime dhe ndërveprime të shpeshta me aeroplanët rusë mbi Detin e Zi, Sirinë, Mesdheun dhe ndonjëherë Atlantikun e Veriut”, tha ai.
Këto deklarata vijnë në kohën kur Elysee paralajmëron se presidenti Emmanuel Macron pritet të bëjë “njoftime të mëdha” përballë kërcënimeve në rritje.
