Një grua është gjetur pa shenja jete në shtëpinë e saj në fshatin Dobrava të Leposaviqit, ndërsa rrethanat e vdekjes së saj janë duke u hetuar nga autoritetet kompetente.
Viktima është Olga Markovic, rreth 76-vjçare, e cila jetonte e vetme, pasi familjarët e saj gjendeshin në Serbi. Pasditën e sotme, rreth orës 13:45, njësia e ndihmës së parë kishte shkuar për ta vizituar, pasi ajo kishte qenë nën trajtim mjekësor, por dera e shtëpisë ishte e mbyllur dhe nuk kishte përgjigje.
Pas kërkesës për asistim, në vendin e ngjarjes ka dalë njësia e patrullës dhe hetuesi, të cilët me forcë kanë hapur derën dhe brenda në një dhomë, e shtrirë në shtrat, është gjetur viktima pa shenja jete. Mjeku që ndodhej në vendin e ngjarjes ka konstatuar vdekjen.
Menjëherë janë njoftuar njësia e hetimeve rajonale dhe ekipi i mjekësisë ligjore, të cilët kanë kryer ekzaminimin preliminar në vendngjarje, ndërsa me urdhër të prokurorit kujdestar, trupi i viktimës është dërguar në obduksion për të përcaktuar shkaqet e sakta të vdekjes.
Rasti është cilësuar si “Hetim i vdekjes” dhe mbetet nën trajtim nga autoritetet.
