Nga lista e pritjes për ndërhyrje kirurgjike deri tek largimi i anesteziologëve, sektorin shëndetësor e përshkon keqmenaxhimi dhe mungesa e planifikimit.
Gazetari dhe publicisti Enver Robelli ka bërë të ditur situatën kritike në shëndetësinë e Kosovës, ku mungesa e anesteziologëve dhe keqmenaxhimi po ndikojnë drejtpërdrejt në trajtimin e pacientëve.
Sipas raportimeve të “Koha Ditore”, vetëm pesë anesteziologë janë të gatshëm, por konkursi për punësim nuk po hapet. Në të njëjtën kohë, 10 inspektorë sanitarë në rajonin e Mitrovicës punojnë pa zyrë dhe pa kushte adekuate, që prej më shumë se një viti.
Në 16 klinika të QKUK-së, mbi 12 mijë pacientë kanë qenë në lista pritjeje për ndërhyrje kirurgjike, ndërkohë që prisnin edhe deri një vit për procedura që në vende me sistem shëndetësor funksional zgjidhen brenda dy deri tre javëve. Mungesa e barnave është pothuajse çdo ditë, sipas raportimeve.
Robelli thekson se pacientët që kanë mundësi, zgjedhin trajtim jashtë vendit, në Shkup, Stamboll ose Gjermani, ndërsa sistemi publik mbetet në një situatë të rënduar nga menaxhimi i dobët, mungesa e llogaridhënies dhe keqadministrimi.
Ai përmend se vetëm tre vite më parë, një anesteziologe vendosi të largohej nga Kosova për shkak të ngarkesës ekstreme dhe kushteve të vështira, ndonëse rroga nuk ishte arsyeja kryesore. QKUK-ja atëherë kishte 48 anesteziologë, ndërsa nevojiteshin të paktën 120.
Sektori shëndetësor i Kosovës përballet gjithashtu me largimin masiv të mjekëve drejt Gjermanisë, ku shteti gjerman përfiton nga mjekët kosovarë që janë trajnuar me para të taksapaguesve kosovarë, pa kontribuar në kosto të arsimit. Robelli vë në dukje se të gjitha vendet e Ballkanit Perëndimor përballen me të njëjtin problem, dhe se sektori i shëndetësisë mbetet një fole korrupsioni, keqmenaxhimi dhe papërgjegjësie.
Ai sugjeron se, në mënyrë teorike, ministrat e Shëndetësisë të Ballkanit mund të krijonin një strategji të përbashkët për kompensim ose bashkëpunim me Gjermaninë, por kjo mbetet një propozim që duket i vështirë për t’u realizuar.
