Zyrtari i PDK-së, Enver Hoxhaj ka dal kundër Konventës së PDK-së në një kohë kaq të shkurtër.
“Kjo nguti nuk garanton garë cilësore, as reformimin dhe unitetin e kërkuar e të domosdoshëm për PDK-në në këtë kohë.”, tha ai.
Dy ditë më parë, Memli Krasniqi dha dorëheqje nga post ii kryetarit të PDK-së. Ai deklaroi se deri tek ky vendim i tij erdhi pas zhvillimeve të shumta në vend dhe pasi këtë gjë e kishte menduar që prej shumë kohës.
Por, Krasniqi vuri në theks se kjo dorëheqje nuk lidhet me rezultatin e zgjedhjeve lokale saktësisht.
Të hënën më 17 nëntor PDK do të zhvillojë Konventën e PDK-së, e ku pritet që Bedri Hamza të marrë drejtimin e partisë.
E këtë gjë thuajse e pohoi krejtësisht Krasniqi, anipse për Hamzën tha se ka dëshirë por se nuk e di si do të shkojë votimi.
Kurse ai deklaroi se gara është e hapur edhe për të tjerë që të hapin kandidaturën.
Bedri Hamza tanimë zyrtarisht ka hapur kandidaturën për kreun e PDK-së, derisa kundër këtyre zhvillimeve sot publikisht doli Enver Hoxhaj.
Hoxhaj në një fazë kishte qenë edhe u.d i kryetarit të partisë, pro jo për shumë gjatë.
Hoxhaj po ashtu në disa raste doli kundër disa prej zhvillimeve të PDK-së, e siç duket tani ka ambicie për të kandiduar, por s’e s’po i pëlqyeka koha.
“Dorëheqja e kryetarit, e shoqëruar me preferenca për pasuesin, krijon përshtypjen e skemave të sajuara e të paragjykuara, të cilat nuk e çojnë partinë përpara. Unë jam qartësisht kundër çdo imponimi, kundër çdo tentative për të orientuar garën dhe kundër çdo formule që shpërfill bazën dhe delegatët”,shtoi Hoxhaj.
Postimi i plotë:
Konventa e PDK-së për të zgjedhur kryetarin e partisë duhet të shtyhet, sepse një parti serioze nuk mund të mbajë një konventë politike dhe përmbajtësore në një kohë kaq të shkurtër. Kërkoj nga Kryesia e PDK-së shtyrjen e Konventës për të paktën deri të dielën e ardhshshme, sepse kështu do u jepej mundësia anëtarësisë dhe delegatëve të njihen me kandidaturat dhe platformat për zhvillimin e partisë dhe për çështje serioze që prekin vendin. Kjo do ta rriste cilësinë e kandidaturave dhe konkurrencën ndërmjet platformave, pasi zhvillimet e fundit kanë qenë të befasishme.
Kjo nguti nuk garanton garë cilësore, as reformimin dhe unitetin e kërkuar e të domosdoshëm për PDK-në në këtë kohë. Në partitë demokratike, më shumë se një kandidaturë është mundësi për delegatët që të zgjedhin lirisht dhe ndihmon në pasurimin e platformave individuale, duke çuar në ndërtimin e një platforme të përbashkët për PDK-në.
Për një vendimmarrje kaq të rëndësishme, kërkoj që procesi zgjedhor të shtyhet, në mënyrë që gara të hapet për të gjithë dhe baza të ketë kohën e duhur për të shprehur vullnetin e saj pa presion dhe pa imponime. Dorëheqja e kryetarit, e shoqëruar me preferenca për pasuesin, krijon përshtypjen e skemave të sajuara e të paragjykuara, të cilat nuk e çojnë partinë përpara.
Unë jam qartësisht kundër çdo imponimi, kundër çdo tentative për të orientuar garën dhe kundër çdo formule që shpërfill bazën dhe delegatët.
PDK-ja ka nevojë për drejtim të ri, jo për skema të vjetra; ka nevojë për vizion të ri, jo për ndërrim rolesh. Ky është momenti për t’i hapur rrugën ndryshimit të vërtetë.
