Një ngjarje e rëndë ka ndodhur këtë të diel në fshatin Tale të Lezhës, ku është vrarë me armë zjarri Pjetër Kaza, rreth 57 vjeç. Sipas Policisë, ai u qëllua në oborrin e banesës së tij, në momentin që po kthehej me automjetin personal.
Dyshimet e para hetimore flasin për një vrasje të mundshme për motive gjakmarrjeje, pasi viktima nuk kishte precedentë penalë. Kujtojmë se tre vite më parë, është ekzekutuar edhe vëllai i tij.
Pas ngjarjes, në vendin e krimit kanë shkuar menjëherë forcat e Policisë së Lezhës të mbështetura nga Forca Kombëtare e Sigurisë nga Njësia Shkodër.
Është ngritur një grup i posaçëm hetimor që, nën drejtimin e Prokurorisë, po punon për zbardhjen e plotë të rrethanave, si dhe për identifikimin dhe kapjen e autorit/ve të mundshëm.
