Ka ndërruar jetë 14-vjeçari, i cili u godit me thikë gjatë një sherri me dy bashkëmoshatarë të tij mesditën e sotme (18 Nëntor) jashtë shkollës 9-vjeçare “Fan Noli” në Tiranë.
Ngjarja raportohet se ka ndodhur rreth orës 13:10, rreth 200-300 metra larg shkollës “Fan Noli” në rrugën “Qema Stafa”.
Në sherrin me thika raportohet se janë përfshirë tre nxënës të moshën 14-vjeç. Për pasojë kanë mbetur të plagosur dy prej tyre, ku adoleshenti me iniciale L. C, humbi jetën, ndërsa 14-vjeçari tjetër ndodhet në spital nën kujdesin e mjekëve.
Viktima mësohet se kishte marrë plagë të shumta në bark dhe u dërgua në spital, por nuk u mbijetoi dot plagëve të marra.
Ndërkohë është shoqëruar njëri nga autorët e dyshuar, ndërsa grupi hetimor po vijon punën për sqarimin e rrethanave të konfliktit.
Njoftimi i policisë:
Më datë 18.11.2024, rreth orës 13:10, në rrugën “Qema Stafa”, rreth 200-300 metra larg shkollës “Fan Noli” janë konfliktuar 3 shtetas të moshës 14 vjeç.
Si pasojë e dëmtimeve të marra gjatë konfliktit, ka ndërruar jetë njëri prej tyre ndërsa tjetri ndodhet në spital, në kujdesin e mjekëve.
Është shoqëruar njëri nga autorët e dyshuar, ndërsa grupi hetimor po vijon punën për sqarimin e rrethanave të konfliktit.
