Të shtunën, dronët ukrainas sulmuan rajonin e Leningradit dhe qytetin e Shën Petersburgut, në një ndër sulmet më të thella ajrore në territorin rus që nga nisja e luftës.
Si pasojë e kërcënimit, Aeroporti ndërkombëtar Pulkovo në Shën Petersburg ka pezulluar përkohësisht operacionet, ndërsa dhjetëra fluturime janë vonuar.
Autoritetet lokale paralajmëruan për ngadalësim të mundshëm të internetit celular në disa pjesë të qytetit.
Guvernatori i Leningradit, Alexander Drozdenko, konfirmoi se një dron ishte rrëzuar në rrethin Tosno, ndërsa më vonë njoftoi për tre dronë të tjerë të neutralizuar në të njëjtën zonë, si dhe nga një tjetër në qytetet Kirishi dhe Gatchina.
Drozdenko u bëri thirrje banorëve që të qëndrojnë larg zonave industriale dhe publike, për shkak të rrezikut nga prania e dronëve në hapësirën ajrore. Ai gjithashtu tha se të gjitha shërbimet e sigurisë janë vendosur në gatishmëri të lartë.
Ndërkohë, guvernatori i Shën Petersburgut, Alexander Beglov, raportoi se një dron u rrëzua në rrethin Pushkino, por theksoi se ngjarja ndodhi larg ndërtesave të banimit. Më vonë ai shtoi se edhe një tjetër dron ishte shkatërruar në lagjen Krasnoselsky.
Ende nuk raportohet për viktima apo dëme materiale serioze, ndërsa autoritetet ruse kanë nisur hetime për të zbuluar mënyrën e operimit dhe depërtimit të dronëve në këto zona.
