Me vërshëllima e brohori, protestuesit parakaluan në sheshin e Prishtinës për të shtatën natë me radhë, për të vijuar drejt qeverisë, në kërkim të drejtësisë për Arlinda Zekajn.
Me parullën “Gjumi s’ka me iu marrë, flaka ka me iu dalë”, protestuesit kërkuan shkarkimin e ministrit Xhelal Sveçla dhe ministres Donika Gërvalla.
Arlinda Zekaj u vra më 25 tetor në Vitomiricë të Pejës nga ish-kunati i saj.
Ajo u vra pak ditë pasi paralajmëroi me letër institucionet se jeta e saj është në rrezik. Vrasja ndodhi pasi u kthye nga Policia ku e paraqiti ish-bashkëshortin për kanosje. Vrasja e saj ka nxitur reagime të shumta, protesta dhe masa në institucione.
Në mesin e zhvillimeve pas rastit është edhe dorëheqja e drejtorit të Përgjithshëm të Policisë së Kosovës, Gazmend Hoxha, si dhe suspendime të prokurorëve e policëve.
