Një këshilltar i lartë i administratës së Donald Trump ka paralajmëruar për rrezikun që Izraeli të marrë në konsideratë përdorimin e armës bërthamore nëse konflikti në Lindjen e Mesme përshkallëzohet më tej.
David Sacks, i cili në administratën Trump mban rolin e përgjegjësit për inteligjencën artificiale dhe kriptovalutat, deklaroi se një sulm i koordinuar ndaj Izraelit mund të krijojë një situatë shumë të rrezikshme.
Ai paralajmëroi për rreziqet e një qasjeje përshkallëzuese në luftën me Iranin dhe me aleatin e tij në Liban, Hezbollahun.
“Izraeli mund të pësojë dëme shumë të mëdha”, tha Sacks, duke shtuar: “Dhe atëherë duhet të shqetësohemi për mundësinë që Izraeli ta përshkallëzojë luftën duke marrë në konsideratë përdorimin e një arme bërthamore.”
Deklaratat e tij janë më të kujdesshme krahasuar me retorikën më të ashpër të vetë Trump dhe të sekretarit amerikan të Mbrojtjes Pete Hegseth, të cilët kanë folur për mundësinë e një fitoreje në luftën kundër Iranit, konflikt që tashmë ka hyrë në javën e tretë.
Ndërkohë, tensionet në rajon po ndikojnë edhe në tregjet globale të energjisë. Mes shqetësimeve për furnizimin me naftë, Trump ka deklaruar se shpreson që vende si Kina, Franca, Japonia, Koreja e Jugut dhe Mbretëria e Bashkuar të dërgojnë anije luftarake për të mbajtur Ngushticën e Hormuzit “të hapur dhe të sigurt” për transportin detar.
Nga ana e saj, Britania e Madhe ka bërë të ditur se po diskuton me aleatët një “sërë opsionesh” për të garantuar sigurinë e transportit në këtë korridor strategjik.
Ndërsa Izraeli dhe SHBA vazhdojnë sulmet ndaj objektivave në Iran, analistët vërejnë se nuk ka ende një fund të qartë për konfliktin. Në të njëjtën kohë, Izraeli ka kryer edhe sulme ndaj objektivave në Liban, në përballjen e tij me Hezbollahun.
Sipas Sacks, një zgjatje e konfliktit mund ta bëjë situatën shumë më të rrezikshme.
“Është e vështirë të dihet saktësisht sa dëme po pëson Izraeli tani. Jemi vetëm dy javë në këtë luftë. Nëse ajo vazhdon për javë apo muaj, Izraeli mund të përballet me shkatërrime shumë serioze”, tha ai.
Ai shtoi gjithashtu se, në këto rrethana, do të ishte më mirë që konflikti të mbyllej sa më shpejt. “Kjo është një kohë e mirë për të shpallur fitoren dhe për t’u tërhequr,” u shpreh ai në podcastin All-In, duke shtuar se një zhvillim i tillë do të ishte pozitiv edhe për tregjet globale.
