Syzet e reja të Google-it janë syze me kamerë dhe zë, që funksionojnë me asistentin e inteligjencës artificiale Gemini. I ka ndërtuar Samsung, ndërsa dizajnin e kanë bërë markat e syzeve Warby Parker dhe Gentle Monster. Mund të porositen tashmë dhe dalin në shitje më 10 dhjetor. Syzet e Warby Parker kushtojnë nga 395 dollarë, ndërsa ato të Gentle Monster nga 450 dollarë. Këtë e raporton Wirecutter, faqja e New York Times për testimin e produkteve, e cila i provoi në selinë e Google-it në Nju Jork.
Ndryshe nga Google Glass i vitit 2013, syzet e reja nuk kanë ekran. Ato përdorin kamerë, mikrofonë dhe altoparlantë të ndërtuar në skelet, dhe punojnë me iPhone dhe me telefona Android përmes aplikacionit Gemini.
ÇKA MUND TË BËJNË?
Përdoruesi mund ta pyesë Gemini-n për atë që po e sheh, të bëjë foto dhe video, të dëgjojë muzikë, të përgjigjet në thirrje dhe të përkthejë biseda në kohë reale. Google e prezanton Gemini-n edhe si agjent personal që planifikon udhëtime, sugjeron receta dhe bën rezervime.
Gjatë testit të Wirecutter-it, gazetarja Brenda Stolyar i kërkoi Gemini-t një recetë smoothie-je nga përbërësit që i kishte para vetes, dhe sugjerime për restorante afër teatrit në Broadway, vetëm duke e shikuar biletën. Sipas saj, Gemini është „shumë më i dobishëm se Meta AI”, asistenti i syzeve Ray-Ban të Meta-s, konkurrenti kryesor në treg.
KARAKTERISTIKAT DHE DIZAJNI
- Kamera: 12 megapikselë, kënd i gjerë, në anën e djathtë të skeletit.
- Pesha: 41 gramë.
- Bateria: deri në nëntë orë, sipas Google-it. Kutia e karikimit siguron disa mbushje shtesë.
- Modelet: nëntë në fillim, tre nga Warby Parker dhe gjashtë nga Gentle Monster, me mundësi për lente me dioptri.
- Abonimi: disa funksione do të kërkojnë abonim me pagesë, sipas faqes amerikane të Gentle Monster. Google nuk ka thënë cilat.
PO PRIVATËSIA?
Privatësia është pyetja më e madhe për të gjitha syzet e mençura. Përpjekja e parë e Google-it dështoi pjesërisht sepse Google Glass nuk kishte dritë që të tregonte kur po incizonte. Këtë herë, sipas Wirecutter-it, një dritë LED në pjesën e përparme pulson kur kamera incizon, dhe kamera ndalet nëse drita mbulohet apo çaktivizohet.
Google thotë gjithashtu se përmbajtjen e incizuar me syze nuk do ta përdorë për ta stërvitur inteligjencën artificiale apo për reklama të personalizuara. Sipas kompanisë, fytyrat dhe zërat e njerëzve përreth fshihen para se pyetjet vizuale të përpunohen në cloud. Transmetimi i drejtpërdrejtë nga syzet është i bllokuar.
SI ARRITËM DERI KËTU
Google i shfaqi syzet për herë të parë në konferencën e zhvilluesve I/O në maj 2026, me harduer nga Samsung dhe çipa nga Qualcomm. Warby Parker e konfirmoi në raportin e tremujorit të tretë se porositë do të hapeshin më 12 nëntor.
ÇKA NUK DIHET ENDE
- Cilat funksione do të kërkojnë abonim dhe sa do të kushtojë ai.
- Kur dhe në cilat shtete do të shiten syzet jashtë ShBA-së, përfshirë Evropën.
- Si funksionojnë kamera, bateria dhe përkthimi në përdorim të përditshëm. Testi i Wirecutter-it zgjati rreth një orë, dhe recensioni i plotë pritet pasi syzet të dalin në shitje.
- Sa do t’i mbajë Google premtimet për privatësinë në praktikë.
