Deputetja e PDK-së, Vlora Çitaku, ka reaguar ndaj nënkryetares së Kuvendit, Albulena Haxhiu, duke e akuzuar për “narracion të ulët politik” dhe për guximin që t’i thotë Salë Jasharit, mbesës së heronjve Sala dhe Hamit Jashari, se është “në koordinim me Listën Serbe”.
Në postimin e saj në Facebook, Çitaku shkruan:
“Më 5, 6 dhe 7 mars, në Prekaz, në betejën më emblematike të kombit shqiptar, me pushkë në dorë ranë Sala dhe Hamit Jashari. Dy heronj të Kosovës.
Sot, mbesa e nënës Salë, Sala e re, Sala Jashari, me votën e shqiptarëve patriotë, është zgjedhur deputete e Kuvendit të Kosovës.
Por, për fat të keq, sot, për nevojat e një narracioni të ulët politik, një nënkryetare e Kuvendit, deri dje Ministre e Drejtësisë, guxon t’i thotë edhe asaj se është ‘në koordinim me Listën Serbe’.
Jo vetëm Sala, por secila deputete dhe secili deputet i PDK-së ka më shumë atribut dhe kontribut për shtetin e Kosovës sesa kjo nënkryetare.
Diku kemi gabuar që një profil i tillë ka arritur të mbajë pozita të larta shtetërore, kjo është e dukshme.
Por uroj që sot të jetë fillimi i fundit i këtij mentaliteti.
E turpshme, për besë.”
