Sot në Kosovë është zhvilluar një operacion i madh ndërkombëtar kundër pastrimit të parave dhe krimit të organizuar, ku janë sekuestruar rreth 1 milion euro asete, në kuadër të një hetimi të udhëhequr nga Guardia di Finanza në bashkëpunim me SCICO, Eurojust dhe Europol, si dhe autoritetet kosovare.
Sipas hetimeve, rasti lidhet me një rrjet kriminal ndërkombëtar të dyshuar për trafik droge në Francë dhe për pastrim parash përmes konvertimit të të ardhurave kriminale në ar dhe pasuri të paluajtshme.
Si sfond i hetimit, Guardia di Finanza ka bërë të ditur se çifti kosovar i arrestuar më herët në Francë dhe i hetuar edhe në Itali dyshohet se ka menaxhuar miliona euro të ardhura nga trafiku i drogës gjatë një periudhe hetimi, të cilat janë qarkulluar mes Italisë dhe Francës dhe më pas janë transformuar në shufra ari përmes rrjeteve të specializuara në përpunimin e metaleve të çmuara në veri të Italisë, me qëllim fshehjen e origjinës së tyre dhe transferimin e mëtejshëm në vende si Kosova, Turqia dhe Maroku.
“Sekuestrimi i aseteve në Kosovë rrjedh nga kontrollet e aseteve të kryera nga Guardia di Finanza (Fiamme Gialle). Pas një shqyrtimi të dokumentacionit të sekuestruar dhe informacionit të fituar nëpërmjet bashkëpunimit gjyqësor me autoritetet e Kosovës, ata rindërtuan asetet e llogarive bankare, pronave tregtare dhe makinave luksoze të mbajtura jashtë vendit nga një çift kosovarësh që banonin në provincën e Alessandrias. Çifti ishte më parë nën hetim në Itali për pastrim parash dhe u arrestua shtatorin e kaluar në Francë pasi u gjetën në posedim të mbi 50 kg shufra ari me cilësi të lartë, të fshehura në pjesën e poshtme të rreme të një makine”, thuhet në njoftim.
Më herët në Francë, në një operacion të ndërlidhur, ishin sekuestruar mbi 30 milionë euro dhe ishte zbuluar edhe ar i fshehur fizikisht.
“Në veçanti, hetimi zbuloi se paratë e drogës të mbledhura në Francë, të vlerësuara në jo më pak se 18 milionë euro gjatë 10 muajve nën hetim, ishin përqendruar në shtëpinë e çiftit në provincën e Alessandrias dhe ishin shndërruar në shufra dhe fletë ari me vlerë ekuivalente me bashkëpunimin e individëve që vepronin në sektorin e shkrirjes dhe përpunimit të metaleve të çmuara të vendosur midis Lombardisë dhe Piemontes”, vijon më tej njoftimi.
Autoritetet bëjnë të ditur se hetimi është ende në fazë paraprake dhe çdo përgjegjësi penale do të përcaktohet vetëm me vendim gjykate përfundimtar, duke mbetur në fuqi prezumimi i pafajësisë.
