Kosova është pranuar në sistemin ndërkombëtar ATA Carnet, i cili u mundëson bizneseve të dërgojnë përkohësisht mallra, pajisje dhe mostra jashtë vendit pa pagesën e detyrimeve doganore dhe taksave të importit.
Lajmin e ka bërë të ditur Oda Ekonomike e Kosovës (OEK).
ATA Carnet njihet si “pasaporta e mallit”. Dokumenti do të lëshohet nga OEK dhe mund të përdoret për mallra dhe pajisje që dërgohen në panaire, ekspozita apo aktivitete të tjera jashtë Kosovës.
Sipas OEK-ut, dokumenti i thjeshton procedurat doganore dhe lehtëson kthimin e mallrave në Kosovë pas përdorimit të tyre jashtë vendit.
OEK vlerëson se përfshirja në këtë sistem do t’u krijojë bizneseve kosovare më shumë mundësi për pjesëmarrje në panaire ndërkombëtare, promovimin e produkteve “Made in Kosovo” dhe zgjerimin e eksporteve.
Oda Ekonomike e Kosovës pritet t’i informojë bizneset për procedurat dhe kushtet për përdorimin e ATA Carnet.
