Bilanci i tërmetit shkatërrues që goditi Afganistanin mbrëmjen e djeshme vijon të përkeqësohet. Sipas të dhënave të raportuara nga qeveria, rreth 800 persona kanë mbetur të vrarë dhe 2,800 të tjerë janë plagosur.
Tërmeti me magnitudë 6 të shkallës Rihter goditi vonë natën e kaluar provincën Kunar, duke shkatërruar disa fshatra.
Pamjet nga provinca fqinje Nangahar tregonin njerëz që gërmonin me dëshpërim nëpër rrënoja me duar ndërsa kërkonin të mbijetuar, si dhe njerëz të plagosur që transportoheshin me barela nga ndërtesat e shembura në helikopterë.
Nga ana tjetër, ekipet ndërkombëtare po ofrojnë ndihmë emergjente dhe po mbështesin trajtimin e të plagosurve në Afganistan. OKB-ja tha se ekipet e saj në Afganistan po ofrojnë ndihmë emergjente dhe mbështetje për shpëtimin e jetës.
“OKB-ja në Afganistan është thellësisht e trishtuar nga tërmeti shkatërrues që goditi rajonin lindor dhe mori qindra jetë, duke plagosur shumë të tjerë. Mendimet tona janë me komunitetet e prekura”, tha OKB-ja.
Organizata Botërore e Shëndetësisë në Afganistan ka thënë gjithashtu se ekipet e saj janë në terren në spitale dhe institucione shëndetësore, duke mbështetur trajtimin e të plagosurve dhe duke vlerësuar nevojat urgjente shëndetësore.
Kujtojmë se një tërmet i mëparshëm me magnitudë 6.3 goditi, Afganistanin më 7 tetor 2023 dhe u pasua nga lëkundje të forta pasuese.
Qeveria talebane vlerësoi se të paktën 4,000 njerëz u vranë, por OKB-ja dha një numër shumë më të ulët, rreth 1,500. Ishte katastrofa natyrore më vdekjeprurëse e Afganistanit në kujtesën e kohëve të fundit.
