Izraeli ka njoftuar një ofensivë të re të madhe në Gaza, pasi nisi një valë sulmesh ajrore në territorin që vrau më shumë se 100 njerëz, si një përpjekje e re për të detyruar Hamasin të lironte pengjet, shkrujnë mediat e huaja.
Në një deklaratë të premten vonë, Forcat Mbrojtëse të Izraelit (IDF) thanë se “kishin nisur sulme të gjera dhe kishin mobilizuar forca për të kapur zonat strategjike në Rripin e Gazës, si pjesë e lëvizjeve hapëse të Operacionit “Gideon’s Chariots” dhe zgjerimit të fushatës në Gaza, për të arritur të gjitha qëllimet e luftës në Gaza.
Njoftimi erdhi pasi Donald Trump përfundoi një vizitë në rajon që përfshinte ndalesa në Arabinë Saudite, Katar dhe Emiratet e Bashkuara Arabe, por jo në Izrael.Më herët të premten, Donald Trump pranoi se njerëzit po vdesin nga uria në Gaza dhe pretendoi se SHBA do të “kujdeset” për situatën në territor.
Presidenti amerikan u tha gazetarëve në Abu Dhabi: “Ne po shikojmë Gazën. Dhe ne do të kujdesemi për këtë. Shumë njerëz po vdesin nga uria.”
Por diskutimet për të ardhmen afatgjatë të Gazës kanë dështuar. Të enjten, Trump përshkroi dëshirën e tij për ta kthyer Gazën në një “zonë lirie”, një përsëritje e mundshme e një plani që ai paraqiti në shkurt që SHBA të merrte kontrollin e territorit palestinez për të lejuar rindërtimin e tij si një qendër luksoze e kohës së lirë dhe biznesi.
Kishte shpresa të përhapura se vizita e Trump në rajon mund të çonte në një pauzë të re në armiqësitë ose një rinovim të ndihmës humanitare për Gazën.
Në vend të kësaj, bastisjet dhe bombardimet gjatë 72 orëve të fundit kanë rritur nivelet e dhunës më të larta se për disa javë, me numrin e të vdekurve që i afrohet atij që u pa në ditët e para të ofensivës së ripërtërirë të Izraelit në Gaza pas rënies së një armëpushimi të brishtë në mars.
Agjencia e mbrojtjes civile të Gazës tha se sulmet e së premtes vranë 108 njerëz, kryesisht gra dhe fëmijë, dhe disa zyrtarë në territorin palestinez thanë se numri i të vrarëve nga sulmet izraelite në ditët e fundit arrin në 250 ose 300.
Të paktën 48 trupa u dërguan në spitalin indonezian në Gazën veriore dhe 16 në spitalin Nasser pas sulmeve në periferi të qytetit qendror Deir al-Balah dhe qytetit jugor të Khan Younis, thanë zyrtarët shëndetësorë.
Në Jabaliya, një lagje në veri të Gazës që ka parë bombardime të rënda për javë të tëra, gratë u ulën duke qarë pranë 10 trupave të veshur me çarçafë të bardhë që ishin rreshtuar në tokë mes rrënojave.
