Komandanti i KFOR-it gjeneralmajor Enrico Barduani është takuar sot me presidenten Vjosa Osmani me të cilën ka diskutuar mbi situatën aktuale dhe bashkëpunimin ndërmjet KFOR-it dhe institucioneve të Kosovës.
Barduani përsëriti përkushtimin e misionit që ai drejton për një Kosovë paqësore dhe stabile, si dhe nënvizoi bashkëpunimin e vazhdueshëm dhe të mirë me organizatat e sigurisë vendore dhe rëndësinë e komunikimit dhe koordinimit të rregullt, në dobi të sigurisë së qëndrueshme në mbarë vendin dhe rajonin.
Ai gjithashtu vuri në dukje bashkëpunimin e ngushtë të KFOR-it me BE në terren, duke përfshirë mbështetjen për dialogun e lehtësuar nga Bashkimi Evropian për normalizimin e marrëdhënieve Kosovë-Serbi.
KFOR-i vazhdon të zbatojë mandatin e tij për të kontribuar në një mjedis të sigurt për të gjithë njerëzit dhe komunitetet në Kosovë dhe lirinë e lëvizjes, në çdo kohë dhe në mënyrë të paanshme, thuhet në komunikatë.
