Barcelona siguroi titullin e 29-të të LaLigas me një fitore 2-0 ndaj rivalëve të përbetuar, Real Madridit, në një natë të hidhur për trajnerin Hansi Flick, babai i të cilit ndërroi jetë disa orë para se kurora spanjolle të vendosej në një El Clásico vetëm për herë të dytë në histori.
Skuadra katalanase e nisi në mënyrë perfekte sfidën, duke kaluar në avantazh në minutën e 9-të me Marcus Rashford, i cili realizoi golin e parë të ndeshjes për 1-0.
Barcelona vazhdoi dominimin dhe në minutën e 18-të dyfishoi epërsinë. Ferran Torres shënoi golin e dytë pas asistimit të Dani Olmos, duke vendosur rezultatin përfundimtar të sfidës.
Pjesa e dytë nuk solli gola, por u karakterizua nga tensione dhe disa ndërhyrje të ashpra. Gjyqtari ndëshkoi me kartonë Eduardo Camavingan, Raul Asencion, Dani Olmon, Jude Bellinghamin dhe Trent Alexander-Arnoldin për ndërhyrje apo sjellje josportive.
Me këtë fitore ndaj Real Madridit, Barcelona siguron matematikisht titullin kampion në La Liga, duke kurorëzuar një sezon të suksesshëm me triumf në derbin më të madh të futbollit spanjoll.
Katalanët kurorëzuan një sezon të shkëlqyer duke siguruar kampionatin e dytë radhazi, dhe të tretin në katër vitet e fundit, pas fitores në El Clásico kundër Real Madridit, duke u bërë kampionë me disa javë të mbetura. Ky është suksesi i 29-të kombëtar për Blaugranën, duke iu afruar më shumë rekordit të Real Madridit.
