Banorët e Rripit të Gazës i kanë përshkruar BBC-së efektet e urisë së rëndë në trupat e tyre, pasi një raport i mbështetur nga OKB-ja konfirmoi për herë të parë urinë në disa pjesë të territorit .
Reem Tawfiq Khader, 41 vjeçe, nënë e 5 fëmijëve nga qyteti i Gazës, tha se “shpallja e urisë erdhi shumë vonë, por është ende e rëndësishme”.
“Nuk kemi ngrënë asnjë proteinë për 5 muaj. Fëmija im më i vogël është 4 vjeç, ai nuk e di se si duken ose si kanë shije frutat dhe perimet”, rrëfeu nëna.
OKB-ja thotë se Izraeli ka kufizuar ndjeshëm sasinë e ndihmës që hyn në Gaza, gjë që Izraeli e mohon.
Izraeli gjithashtu mohon se ka uri në territor, në kundërshtim të drejtpërdrejtë me atë që thonë më shumë se 100 grupe humanitare, dëshmitarë në terren dhe organe të shumta të OKB-së.
Të premten, Klasifikimi i Integruar i Fazës së Sigurisë Ushqimore (IPC) i mbështetur nga OKB-ja tha se kishte një zi buke “tërësisht të shkaktuar nga njeriu” në Qytetin e Gazës dhe zonat përreth tij.
IPC paralajmëroi se më shumë se gjysmë milioni njerëz në të gjithë Rripin e Gazës po përballeshin me kushte “katastrofike” të karakterizuara nga “uria, varfëria dhe vdekja”.
Rajaa Talbeh, 47 vjeçe, nënë e gjashtë fëmijëve, tha se kishte humbur 25 kg në peshë. Ajo iku nga shtëpia e saj në lagjen Zeitoun të qytetit të Gazës një muaj më parë dhe tani jeton në një tendë të improvizuar pranë plazhit.
Ajo vuan nga intoleranca ndaj glutenit dhe tha se nuk mund të gjente më ushqim për të ngrënë.
Qindra palestinezë janë vrarë në ose pranë vendeve të shpërndarjes së ndihmave të drejtuara nga Fondacioni Humanitar i Gazës (GHF) i mbështetur nga Izraeli dhe SHBA-të.
“Para luftës, një organizatë bamirëse më ndihmonte të merrja produkte pa gluten, të cilat nuk mund t’i përballoja kurrë vetë”, tha ajo.
“Që kur filloi lufta, nuk mund ta gjej atë që më nevojitet në treg, dhe edhe kur e gjej, nuk kam mundësi ta përballoj.
A nuk mjafton të përballosh bombardimet e përditshme, zhvendosjen dhe të jetosh në një tendë që nuk na mbron as nga vapa e verës dhe as nga i ftohti i dimrit dhe tani edhe nga uria?”
Rida Hijeh, 29 vjeçe, tha se pesha e vajzës së saj 5-vjeçare, Lamia, kishte rënë nga 19 kg në 10.5 kg.
Ajo tha se Lamia ishte e shëndetshme para se të fillonte lufta dhe nuk kishte pasur sëmundje të mëparshme.
“E gjithë kjo ndodhi vetëm për shkak të urisë,” tha ajo.
“Thjesht nuk ka asgjë për të ngrënë fëmija. Nuk ka perime, as fruta.”
Tani, Lamia vuan nga ënjtje në këmbë, hollim të flokëve dhe probleme nervore, tha ajo.
“Ajo nuk mund të ecë. Shkova në shumë klinika, mjekë dhe spitale. Të gjithë më thanë se vajza ime vuan nga kequshqyerja. Por asnjëri prej tyre nuk më dha asgjë, as trajtim, as mbështetje.”
Mandy Blackman, një infermiere britanike që punon për organizatën bamirëse UK-Med në Gaza, tha se 70% e nënave që frekuentojnë klinikat e tyre të shëndetit të nënës, para lindjes dhe pas lindjes kishin kequshqyerje klinike.
“Si rezultat, foshnjat lindin më të vogla dhe më të prekshme”, tha ajo.
Më shumë se 62,000 njerëz janë vrarë në Gaza që kur Izraeli filloi fushatën e tij ushtarake, në përgjigje të sulmit të udhëhequr nga Hamasi në Izraelin jugor më 7 tetor 2023, në të cilin u vranë rreth 1,200 njerëz dhe 251 të tjerë u morën peng.
Që nga fillimi i luftës, të paktën 271 persona, përfshirë 112 fëmijë, kanë vdekur nga “uria dhe kequshqyerja”, sipas ministrisë së shëndetësisë të Gazës, e cila drejtohet nga Hamasi.
Një grua tjetër, Aseel, e cila jeton në qytetin e Gazës, tha se “5 muaj më parë, peshoja 56 kg, sot peshoj vetëm 46 kg”.
Ajo tha se nuk kishte ngrënë asnjë frut apo mish prej muajsh dhe kishte shpenzuar pothuajse të gjitha kursimet e saj për përbërës bazë për të mbijetuar.
Kunata e Aseel, me të cilën ajo jeton, ka një foshnjë njëmuajshe.
“Ajo ka kërkuar me dëshpërim formulë për foshnje me një çmim të arsyeshëm”, tha Aseel. Ajo tha se kur mund ta gjejnë, kushton deri në 180 shekele (39 paund) për kanaçe.
“Nuk kam rezerva ushqimore, as sa për një ose dy javë,” shtoi ajo.
“Ashtu si mijëra njerëz, ne jetojmë ditë për ditë.” /Përshtatur nga BBC/
