Një gjeneral i ushtrisë ruse u plagos me armë zjarri mëngjesin e sotëm në Moskë, në një episod që ka vënë në lëvizje strukturat hetimore dhe të sigurisë.
Komiteti Hetues Rus njoftoi se gjenerali Vladimir Alexeyev u sulmua brenda një apartamenti në veriperëndim të kryeqytetit. Sipas autoriteteve, një person ende i paidentifikuar e qëlloi disa herë dhe u largua menjëherë nga vendngjarja, raporton Reuters.
Alexeyev u transportua në spital, ku ndodhet nën kujdes mjekësor dhe në monitorim të vazhdueshëm. Hetuesit kanë sekuestruar pamjet e kamerave të sigurisë në zonë dhe kanë nisur veprime për identifikimin dhe kapjen e autorit.
Gjenerali mban detyrën e zëvendësshefit të Drejtorisë Kryesore të Shtabit të Përgjithshëm në Ministrinë e Mbrojtjes së Rusisë, një strukturë kyçe e hierarkisë ushtarake ruse. Sulmi ndodh në një periudhë tensionesh të shtuara të sigurisë në Rusi, ndërsa autoritetet nuk kanë dhënë ende informacion mbi shkaqet apo motivet e ngjarjes.
