Një incident ndodhi në orët e para të mëngjesit të sotëm, kur një i burgosur turk u hodh në det teksa po transportohej me traget nga burgu i Koridhalos drejt Mytilenes.
Sipas burimeve zyrtare, i prangosuri që po ruhej nga katër efektivë policie u ngrit papritur nga vendi ku po flinte, vrapoi dhe u hodh në det, duke i zënë në befasi shoqëruesit e tij. Incidenti ndodhi teksa anija ndodhej në ujërat midis ishujve Chios dhe Oinousses.
Raportohet se një qytetar që ndodhej pranë, hapi derën dhe i mundësoi të burgosurit të arrinte në pjesën e jashtme e të hidhej në det.
I dyshuari ishte arrestuar më 7 korrik 2025 nga autoritetet portuale të Lesvos, i akuzuar për përfshirje në trafikim të paligjshëm të emigrantëve. Ai po dërgohej në Mytilene për të dalë para autoriteteve gjyqësore.
Pas njoftimit të menjëhershëm nga policët, kapiteni i tragetit ndaloi lëvizjen e anijes dhe nisi operacionin e kërkimit. Në zonë u përfshinë mjete të Rojës Bregdetare greke, por deri tani nuk është arritur lokalizimi i të burgosurit.
