Arbnore Përquku është njëra ndër figurat më dominuese dhe më jetëgjata në historinë e basketbollit të femrave në Kosovë. Karrierën e nisi para 20 viteve, në edicionin 2003/04, me ekipin Universiteti në Trocal, duke treguar që në moshë të re talentin dhe karakterin e një lojtareje të madhe.
Ajo që filloi si një premtim i ri për basketbollin e femrave, sot, dy dekada më vonë, është shndërruar në një histori të jashtëzakonshme suksesi, që vazhdon me të njëjtin ritëm, intensitet dhe ndikim.
Me karrierë ku ka fituar dhjetëra trofe kombëtarë dhe paraqitje ndërkombëtare, Përquku mbetet simbol i lidershipit, profesionalizmit dhe qëndrueshmërisë sportive.
Liderja e përfaqësueses – statistika që flasin vetë
Pazëvendësueshmëria e Përqukut u konfirmua fuqishëm edhe në FIBA Women’s European Championship for Small Countries 2024, ku ajo dëshmoi sërish pse konsiderohet një ikonë e vërtetë e sportit.
Performanca e saj stabile, lidershipi në parket dhe ndikimi në lojë e bënë një ndër figurat më të spikatura të turneut. Gjatë këtij turneu, ajo shënoi:
14.8 pikë për ndeshje
6 kërcime mesatare
4.6 asistime
15.2 indeks efikasiteti (EFF)
5 ndeshje si startuese absolute e Kosovës
Këto shifra konfirmojnë ndikimin e saj të drejtpërdrejtë në lojë, qetësinë në momente kritike dhe rolin udhëheqës në parket, duke qenë lojtare e besueshme dhe stabile në çdo konkurrencë. Me ekipin përfaqësues të Kosovës, ajo ka qenë pjesë kyçe në të gjitha ciklet e garave evropiane, duke i sjellë vendit paraqitje të rëndësishme dhe dinjitoze.
Karrierë e pasur me suksese
Arbnore ka veshur fanellën e shumë klubeve të rëndësishme të Kosovës gjatë viteve, duke fituar dhjetëra herë Kampionatin e Kosovës, Kupën e Kosovës dhe Superkupën.
Së fundmi, me ekipin KBF Peja 03, ku mban shiritin e kapitenes, ajo ka shtuar në listën e saj të gjatë të arritjeve edhe SuperKupën e Femrave. Ky trofe dëshmon edhe një herë ndikimin e saj vendimtar dhe faktin e padiskutueshëm që sportdashësit e përsërisin gjithnjë: aty ku është Arbnora, është kupa.
Sot, Përquku vazhdon të jetë një nga figurat më të rëndësishme të KBF Peja 03, duke kontribuar si lojtare, kapiten dhe forcë stabilizuese e ekipit, brenda dhe jashtë fushës.
Edhe pse 37-vjeçare, ajo vazhdon të luajë me intensitet, disiplinë dhe profesionalizëm që tejkalon shumë lojtare më të reja. Përkushtimi i saj në stërvitje, puna e përditshme dhe kujdesi ndaj trupit e bëjnë shembull të rrallë të karrierës së gjatë dhe të suksesshme.
Stili i lojës – inteligjencë, përvojë dhe klas
E njohur për leximin perfekt të lojës, vendimmarrjen e shpejtë dhe aftësinë për të mbajtur skuadrën të qetë, Përquku i jep strukturë dhe qëllim çdo aksioni. Ajo njihet për kontroll të jashtëzakonshëm të topit, vizion të pastër në pasime dhe udhëheqje të lindur. Për vite të tëra, Arbnorja ka qenë lojtare model për brezat e rinj, duke frymëzuar vajzat e Kosovës të besojnë në sportin profesionist.
Një legjendë e gjallë
Arbnore Përquku është shumë më tepër se një lojtare e suksesshme. Ajo është simbol i emancipimit të sportit të femrave dhe shembull i qëndrueshmërisë dhe profesionalizmit. Emri i saj është sinonim i respektit dhe frymëzimit për të gjithë basketbollin femëror.
