Kthimi i Anthony Joshuas në ring është “rikthimi përfundimtar”, por edhe një “rrezik” duke pasur parasysh atë që ka kaluar në gjashtë muajt e fundit, thotë promotori i tij Eddie Hearn.
Boksieri i peshave të rënda Anthony Joshua do të përballet me shqiptarin Kristian Prenga më 25 korrik në Riad të Arabisë Saudite, para një meçi të shumëpritur më vonë këtë vit kundër bashkëkombësit të tij Tyson Fury.
Joshua zhvilloi meçin e fundit në dhjetor, kur mposhti Jake Paul.
Më pas, ai u përfshi në një aksident automobilistik në Nigeri, ku dy anëtarë të ekipit të tij humbën jetën.
36-vjeçari ka deklaruar se “ka marrë kohë për t’u konsoliduar dhe për t’u rindërtuar”, në mënyrë që të jetë gati për rikthimin në ring kundër Prengës, i cili ka një rekord prej 20 fitoresh (të gjitha me nokaut) dhe një humbje.
“Ne e dimë gjithashtu rrezikun e këtij rikthimi, duke pasur parasysh gjithçka që ai ka kaluar,” tha Hearn për BBC Sport.
“Ata po e quajnë këtë një rikthim. Njerëzit mund të mendojnë se është e çuditshme, sepse kanë kaluar vetëm gjashtë muaj nga ndeshja e fundit, por në fakt është rikthimi i fundit”.
“Është rikthim nga momentet më të vështira. Jo vetëm mendërisht dhe emocionalisht, por edhe fizikisht.”
“Lëndimet që ai pësoi në atë aksident, shumë njerëz nuk do të luftonin më kurrë.
Forca që ai ka treguar është vërtet e jashtëzakonshme”.
Ndërkohë, ylli i muzikës pop Dua Lipa ishte kontaktuar për të performuar në meçin mes Furyt dhe Joshuas, por e refuzoi ofertën dhe nuk pritet të jetë pjesë e ngjarjes.
Hearn u habit nga pyetjet nëse dueli do të zhvillohej apo jo pas refuzimit të këngëtares shqiptare Dua Lipa dhe këmbënguli se “ndeshja vazhdon siç është planifikuar”.
“Nuk më intereson. Nuk dua askënd,” tha Hearn. “Unë vetëm dua që ata të dy të futen në ring, kjo është ajo që dua.
Më lini të ulem pranë ringut dhe të shoh momentin kur të gjithë dalin jashtë ringut, Anthony Joshua në njërin kënd, Tyson Fury në tjetrin, dhe arbitri të thotë: ‘Sekondat jashtë, raundi i parë’, e gjithë bota të mbetet pa frymë.
Nuk më duhet muzikë, më jepni dramën”.
