Drejtori i përgjithshëm i Agjencisë Ndërkombëtare për Energjinë Bërthamore (IAEA), Rafael Grossi, ka deklaruar për Sky News se nuk ka prova që Irani po përpiqet të zhvillojë armë bërthamore.
“Arritëm në përfundimin se nuk mund të pohojmë se ekziston një përpjekje sistematike në Iran për të prodhuar një armë bërthamore në këtë moment,” tha Grossi.
Ai theksoi se raporti i IAEA-së, i cili është cituar gjerësisht nga Izraeli, tregon se Irani po pasuron uranium në nivelin 60%, që është niveli më i lartë i pasurimit në botë për një vend pa armë bërthamore.
“Ka elementë që shkaktojnë shqetësim,” shtoi ai, por sqaroi: “Sa i përket ndërtimit dhe prodhimit të një arme bërthamore – jo, nuk e kemi thënë një gjë të tillë.”
I pyetur për sulmet e mundshme nga Izraeli ndaj objekteve bërthamore iraniane, Grossi u shpreh i shqetësuar: “Sigurisht që jemi të shqetësuar.” Ai paralajmëroi për rrezikun e një “ngjarjeje radiologjike” në rast të goditjes së një objekti bërthamor, që mund të çojë në “përhapjen e materialit bërthamor në atmosferë”.
