Në Ferizaj është përuruar zyrtarisht nënkalimi më i madh i ndërtuar ndonjëherë në Kosovë, si pjesë e projektit të transformimit urban pranë Stacionit të Policisë.
Kryetari Agim Aliu e quajti këtë vepër një “kryevepër infrastrukturore” dhe “simbol identitar” për qytetin.
Ngjarja festive u shënua me pjesëmarrje të madhe të qytetarëve, fishekzjarre, dekorime dhe flamuj amerikanë, në nder të Ditës së Pavarësisë së SHBA-ve.
“Ishte një moment historik për Ferizajn. Nën buzëqeshjet e fëmijëve dhe entuziazmin e qytetarëve, përuruam një projekt madhor që do t’i shërbejë brezave të tanishëm dhe atyre të ardhshëm,” u shpreh Aliu.
“Ta gëzojë Ferizaj, ta gëzojnë ferizajasit,” tha kryetari.
