Presidentja Vjosa Osmani ka pritur në takim sot në Presidencë kryetarin e Nismës, Fatmir Limaj.
Presidenca tha se ky takim u zhvillua në kuadër të konsultimeve me subjektet politike parlamentare për konstituimin e Kuvendit të Kosovës.
“Ky takim vjen në prag të përfundimit të afatit kushtetues të përcaktuar me Aktgjykimin e Gjykatës Kushtetuese në rastin KO124/25, i cili obligon deputetët që të konstituojnë Kuvendin brenda 30 ditëve, konkretisht deri më 26 korrik”, thuhet në njoftim.
Presidenca tha se Osmani në takim ka theksuar se “zbatimi i këtij aktgjykimi është detyrim i qartë kushtetues dhe potencoi rëndësinë që të gjithë përfaqësuesit e qytetarëve të veprojnë në frymën e bashkëpunimit dhe mirëbesimit, me qëllim të arritjes së një zgjidhjeje sa më të shpejtë për konstituimin e Kuvendit, në interes të qytetarëve dhe funksionimit demokratik të shtetit”.
Partia e Limajt ka tri ulëse në Kuvend, ndërsa qe një kohë është përfolur për një bashkëpunim të mundshëm me partinë e parë, Vetëvendosje.
