Nisma Socialdemokrate ka konfirmuar se do të marrë pjesë e vetme në zgjedhjet e parakohshme parlamentare të 28 dhjetorit.
Lajmin e ka bërë të ditur kryetari i partisë, Fatmir Limaj, gjatë një interviste në Debat Plus, ku tha se ky vendim ishte opsioni i fundit i subjektit.
“Partia është e regjistruar. Gjithmonë ka hapësirë, por opsioni ynë i fundit ka qenë të shkojmë vetëm. Por jemi regjistruar dhe shkojmë vetë në zgjedhje, si opsion i fundit i ynë”, deklaroi Limaj.
Ai tha se, pavarësisht pjesëmarrjes së pavarur në zgjedhje, Nisma mbetet e hapur për bashkëpunim me të gjitha subjektet politike kur bëhet fjalë për çështje që prekin interesin e përgjithshëm të vendit.
“Vazhdoj të mbaj të njëjtin qëndrim: me interesa të shtetit. Kurdo që më ftojnë – LVV, PDK, LDK… e harrove edhe Ramushin – kushdo që më fton dhe ka diçka për të thënë për temat nacionale, dhe ka interes ta dëgjojë mendimin tim, gjithmonë jam i gatshëm”, u shpreh Limaj.
