Ndërsa Izraeli dhe Irani shkëmbejnë valë sulmesh, Presidenti i SHBA-së Donald Trump ka thënë publikisht dhe privatisht se dëshiron ta mbajë SHBA-në jashtë konfliktit.
Trump kundërshtoi një plan izraelit për të vrarë udhëheqësin suprem të Iranit, Ajatollah Ali Khamenei, sipas dy burimeve. Këtë fundjavë, një zyrtar i lartë amerikan tha se izraelitët kishin një mundësi për të vrarë udhëheqësin suprem. SHBA-të i komunikuan Izraelit se Trump kundërshtoi planin, tha zyrtari, dhe plani nuk u zbatua. Nga ana tjetër, kryeministri izraelit Benjamin Netanyahu mohoi raportet për një plan të tillë.
SHBA-të i kanë ofruar mbështetje mbrojtëse Izraelit, duke penguar një sulm të fuqishëm hakmarrës nga Irani. Por Trump nuk është bashkuar me ushtrinë izraelite në përpjekjet e saj për të çmontuar objektet bërthamore të Iranit.
Burimet thanë se Izraeli kishte folur me SHBA-në rreth rritjes së mundshme të nivelit të përfshirjes së saj, megjithëse një zyrtar izraelit paralajmëroi se këto biseda nuk kanë përfshirë ende diskutime “praktike” mbi detajet më të imëta.
MMegjithatë, Trump ka pranuar se përfshirja e SHBA-së në konflikt është një mundësi.
“Ne nuk jemi të përfshirë në të. Është e mundur që të përfshihemi. Por në këtë moment nuk jemi të përfshirë”, tha Trump për ABC News të dielën.
Interesat konkurruese kanë krijuar një dinamikë të ndërlikuar për një president të etur për të mbajtur premtimin e tij për të sjellë paqe në rajonet e trazuara të botës.
