Nëndetësja bërthamore amerikane USS Newport News, e pajisur me raketa lundrimi Tomahawk, është ankoruar për herë të parë në Islandë, në një kohë kur Uashingtoni dhe NATO janë në shqetësim për aktivitetin ushtarak rus në Arktik dhe Veriun e Largët.
Komandanti i Marinës Amerikane në Evropë dhe Afrikë theksoi se kjo është një sinjal strategjik për kundërshtarët dhe një mbështetje për aleatët në rajon.
“SHBA mbajtën një bazë detare këtu për dekada dhe u mbështetën te Islanda për të monitoruar operacionet e nëndetëseve sovjetike dhe më pas ruse,” tha komandanti, duke shtuar se Islanda është kyçe për strategjinë amerikane në Arktik për shkak të pozicionit të saj gjeostrategjik.
Strategjia Arktike e Pentagonit për vitin 2024 thekson rëndësinë e zonës nga Groenlanda deri në Britaninë e Madhe, ku SHBA-ja synon të ruajë një prani të fortë përballë sfidave nga Rusia dhe Kina.
Erin Sawyer, e ngarkuara me punë në ambasadën amerikane në Islandë, deklaroi: “Uashingtoni dhe Reykjaviku ndajnë një qëllim të përbashkët për të mbajtur tensionet të ulëta në Arktik, ndërsa janë plotësisht të vetëdijshëm për përpjekjet e Rusisë për të forcuar praninë e saj ushtarake në rajon.”
Në vitin 2023 një nëndetëse bërthamore amerikane kishte hyrë në ujërat territoriale të Islandës, por këtë herë USS Newport News u ankorua pranë skelës dhe ekuipazhi i saj zbarkoi në breg.
Nëndetëset e klasit Los Angeles, ku bën pjesë edhe USS Newport News, janë ndër nëndetëset më të shpejta dhe të rëndësishme të Marinës Amerikane, me rreth 40 në shërbim aktiv.
