Sipas disa ministrave që ishin të pranishëm në “La Nuvola” tre ditë më parë, në konferencën për Ukrainën, Giorgia Meloni ishte në humor të keq larg kamerave dhe blloqeve të shënimeve. Kjo ndodhi menjëherë pas një shkëmbimi me Ursula von der Leyen, me temë doganat.
Kryeministrja italiane, pra, ishte në dijeni paraprakisht, konfirmojnë burime nga Palazzo Chigi se letra e përgatitur nga Donald Trump do të ishte e ashpër. Një goditje e mundshme për ekonominë italiane dhe të gjithë kontinentit.
Në ditën kur letra i dorëzohet zyrtarisht Brukselit, Meloni përdor tone të kujdesshme në publik. Në mënyrë private ajo komunikon sërish me von der Leyen, por edhe me liderë të tjerë europianë, si presidenti francez Emmanuel Macron dhe kryetari gjerman Friedrich Merz. Ajo u thotë bashkëpunëtorëve se lëvizja e Trumpit është thjesht “një manovër për të frikësuar europianët”.
Në orët e pasdites, Meloni lëshon një komunikatë në të cilën fjala “letër” nuk përmendet asnjëherë. Flitet në mënyrë të përgjithshme për “zhvillimin e negociatave”.
🔊
Italia, thotë Meloni zyrtarisht, “mbështet plotësisht” përpjekjet e Komisionit Europian dhe “beson në vullnetin e mirë të të gjithë aktorëve për të arritur një marrëveshje të drejtë, që të forcojë Perëndimin në tërësi”.
Sepse “nuk ka asnjë kuptim të nxisim një përplasje tregtare ndërmjet të dy anëve të Atlantikut”. Në fund të mesazhit dallohet një dozë irritimi ndaj atyre që nxisin “polarizime që e bëjnë më të vështirë arritjen e një marrëveshjeje”.
Qëndrimi është i qartë: minimizim.
Lëvizja e Trumpit paraqitet thjesht si një “mjet shtesë presioni”, një “ofertë shumë e lartë”, me shpresën që “të arrihet një pikë ekuilibri”. Sipas disa burimeve, tashmë në një telefonatë me Trumpin javën e kaluar, Meloni do të kishte përmendur 10% si një prag që “mund të përballohet” nga sektori prodhues italian. Për më tepër, Meloni mendon se “në një luftë tregtare humbasin të gjithë, si ne ashtu edhe SHBA”. Prandaj, tani “qetësi dhe vazhdim i negociatave negociatat e vërteta sapo kanë filluar”.
Nga rrethi i kryeministres vjen irritim ndaj atyre që e shtojnë tensionin. Kjo vlen për opozitën, por edhe për alarmin e shumë organizatave të botës së biznesit, që janë natyrshëm shumë të shqetësuara nga rrjedha që po merr çështja. Por jo vetëm. Qeveria italiane nuk e ndan qasjen e Francës, e cila përshkruhet nga disa burime të ekzekutivit si “e ashpër”. Meloni, ashtu si ministri i Jashtëm Antonio Tajani, nuk mbështet idenë e vendosjes së kundër-doganave europiane menjëherë. Dhe duket në një linjë me Gjermaninë, e cila dje kërkoi një “negociatë pragmatike”.
Pavarësisht mbështetjes publike për von der Leyen, disa burime qeveritare tregojnë se Meloni nuk e ka pëlqyer mënyrën se si presidentja e Komisionit ka menaxhuar deri tani negociatat “pak politike” dhe pa bërë disa lëshime ndaj SHBA-së, të cilat mund të ishin bërë (dhe ende mund të bëhen), sidomos në temën e thjeshtimit të licencave dhe procedurave burokratike. Në një ditë të zymtë, shpresa e kryeministres është se negociatat mund të rikuperohen.
Që 18 ditët e mbetura deri më 1 gusht të ofrojnë ende një hapësirë për marrëveshje. Edhe sepse në këtë lojë mund të luajnë rol edhe investimet ushtarake, duke qenë se Trumpi do që vendet europiane të blejnë armë amerikane për t’i dërguar më pas në Ukrainë. Tajani do të udhëtojë për në Uashington të martën, për të takuar sekretarin amerikan të Shtetit, Marco Rubio.
Meloni e di se një dështim i negociatave do të kishte pasoja në nivel të konsensusit politik. Bota e biznesit është tashmë tejet e shqetësuar. Dhe si Lega, ashtu edhe Forza Italia duket se po distancohen. Forza Italia kritikon doganat, duke i quajtur “një dëm për lirinë e tregtisë”, dhe i kërkon Europës “të reagojë”. Ndërsa Lega e fajëson Brukselin, Bashkimin Europian “nën drejtimin gjerman”, që sipas saj dëmton “ndërmarrjet dhe familjet europiane shumë më parë sesa doganat e mundshme të Trumpit, i cili nuk ka arsye të sulmojë vendin tonë”.
