Faza e grupeve të Kupës së Botës për Klube ka përfunduar dhe është bërë e qartë se hendeku midis ekipeve evropiane dhe atyre nga Amerika e Jugut ose Azia nuk është aq i madh sa mund të mendohet. Megjithatë, përfaqësueset e kontinentit të vjetër mbeten pretendentët kryesorë për të fituar titullin.
Superkompjuteri i “Opta”-s ka publikuar parashikimet e tij, dhe vjen me surprizën se Reali i Madridit nuk është as në pesë ekipet më të mundshme për të fituar titullin. Pavarësisht fitores 3-0 ndaj Salcburgut dhe formës së tyre të përmirësuar, ekipi i Çabi Alonsos nuk konsiderohet favorit.
Sipas makinës, ata kanë një shans prej 9.7%. Megjithatë, Reali ka një shans prej 62.7% për të mposhtur Juventusin dhe për të arritur në çerekfinale. Prandaj, skuadra italiane është në vendin e nëntë.
Në krye të tabelës janë PSG-ja dhe Mançester Siti me përkatësisht 20.6% dhe 20.4%. Skuadra pariziene e nisi tashmë Kupën e Botës si favorite e qartë dhe mbetet e tillë. Për ekipin e Pep Guardiolës, performanca e tyre mbresëlënëse kundër Juventusit, duke fituar 5-2, i ka vendosur përsëri ata si një nga pretendentët më të fortë për fitimin e trofeut.
“Siti është në një nivel jashtëzakonisht të lartë. Është një ekip që, gjatë 10 viteve të fundit, ka pasur një trajner që bën gjëra të mrekullueshme“, komentoi trajneri i Juventusit, Igor Tudor.
Pesëshja e parë plotësohet nga Interi, Bajerni i Mynihut dhe Çelsi, me përkatësisht 12.4%, 11.3% dhe 10.6%. Kjo është e njëjta renditje si para fillimit të garës, por me një ndryshim: Çelsi ka kaluar Realin. Jashtë ekipeve të Kontinentit të Vjetër, e para është Palmeiras me 0.9%. Sipas “Opta”-s, Inter Majemi me Leo Mesin, Suarezin, Zhordi Albën dhe kompaninë, ka 0.3% shanse.
Si funksionon superkompjuteri i Optës?
Modeli vlerëson probabilitetin e çdo rezultati të ndeshjes (fitore, barazim ose humbje) duke përdorur shanset e tregut të basteve dhe “Opta Power Rankings”. Shanset dhe renditjet bazohen në performancën historike dhe të fundit të ekipeve. Gara simulohet 10.000 herë për të gjeneruar një parashikim përfundimtar për secilën ekip.
