Të paktën gjashtë persona kanë humbur jetën dhe më shumë se 80,000 banorë janë evakuuar pas përmbytjeve të mëdha që goditën provincën Guizhou në Kinën jugperëndimore, raportuan të enjten mediat shtetërore.
Sipas transmetuesit shtetëror CCTV, përmbytjet “jashtëzakonisht të mëdha” nisën në qarkun Rongjiang që nga e marta, duke shkaktuar dëme të mëdha në infrastrukturë, ndërprerje të komunikimit dhe bllokim trafiku në disa zona.
Autoritetet lokale aktivizuan përgjigjen emergjente më të lartë ndaj përmbytjeve. U raportua se shumë zona të ulëta janë përmbytur, ndërsa në qytetin Rongjiang, një fushë futbolli u zhyt nën tre metra ujë dhe banorët u shpëtuan nga katet e sipërme të shtëpive të tyre.
Në pjesët ku uji është tërhequr, banorët janë parë duke pastruar rrugët nga balta dhe mbeturinat.
Përmbytjet pasojnë goditjen e provincës nga një depresion tropikal, që solli reshje të dendura dhe përkeqësoi situatën.
