Kryeministri në detyrë, Albin Kurti, ka reaguar sërish lidhur me shtesat për lehonat, duke mos lënë pa kritikuar qeveritë e mëhershme që, sipas tij, nuk kishin ofruar asnjë mbështetje financiare për këtë kategori.
Përmes një postimi në rrjetet sociale, Kurti ka shpërndarë fjalët e ministrit të Financave, Hekuran Murati, i cili një ditë më parë foli për rritjen e shtesave për lehonat dhe kritikoi qasjen e mëparshme institucionale.
“Në Republikën tonë gjithmonë ka pasur nëna lehona dhe fëmijë. Por vetëm falë qeverisjes sonë do të ketë gjithmonë shtesa dhe mbështetje për nënat lehona dhe fëmijët”, shkroi Kurti.
Ai theksoi se ndihma për këtë kategori është rritur ndjeshëm muajin e fundit.
“Nënat e reja tash marrin 325.9 euro në muaj nga 170 euro sa merrnin deri në muajin e kaluar. E para katër vjetëve nuk merrnin asnjë cent mbështetje financiare nga shteti”, vijoi ai.
