Basketbollistja shqiptare, Lorela Cubaj, ishte protagoniste kryesore në fitoren historike të Italisë ndaj Turqisë në çerekfinalen e Kampionatit Evropian për femra, që po zhvillohet në Greqi.
Takimi dramatik përfundoi me rezultat të barabartë në kohën e rregullt, 68:68, duke e çuar sfidën në vazhdime, ku Italia arriti të triumfojë me shifrat 76:74.
Cubaj shkëlqeu në momentet vendimtare të ndeshjes, duke realizuar gjashtë pikë gjatë kohës shtesë dhe duke përfunduar me gjithsej 16 pikë të shënuara. Kontributi i saj ishte kyç në kualifikimin e ekipit italian në gjysmëfinale të Eurobasketit – për herë të parë pas tri dekadash.
