Senatori amerikan Bernie Sanders ka paralajmëruar kundër përfshirjes së Shteteve të Bashkuara në ndonjë veprim ushtarak kundër Iranit, duke kujtuar përvojën e hidhur të luftës në Irak dhe rolin e kryeministrit izraelit Benjamin Netanyahu në nxitjen e saj.
Sanders rikujtoi se në vitin 2002, Netanyahu kishte dëshmuar para Kongresit amerikan duke e nxitur SHBA-në të pushtonte Irakun, me pretendimin se Saddam Hussein po zhvillonte armë bërthamore.
“‘Nëse e rrëzoni regjimin e Sadamit, ju garantoj se kjo do të ketë jehonë të madhe pozitive’, tha Netanyahu në atë kohë”, theksoi Sanders në deklaratën e tij.
Senatori theksoi se “Netanyahu gaboi”, duke shtuar se pasojat e luftës në Irak ishin katastrofike: “Lufta në Irak rezultoi në 4,492 vdekje të ushtarëve amerikanë, mbi 32,000 të plagosur dhe një kosto prej afërsisht tre trilionë dollarësh. Qindra mijëra irakianë vdiqën gjithashtu si rezultat i asaj lufte tragjike.”
“Nuk duhet të përfshihemi në luftën e Netanyahut kundër Iranit”, përfundoi Sanders, duke e cilësuar këtë një rrezik të panevojshëm për SHBA-në dhe për stabilitetin global.
