Ushtria izraelite ka konfirmuar se ka kryer sulme ajrore ndaj reaktorit bërthamor në Arak dhe një objekti tjetër në Natanz, duke pretenduar se qëllimi ishte pengimi i përparimeve të Iranit në programin e tij të armëve bërthamore.
Sipas Forcave Mbrojtëse të Izraelit (IDF), reaktori në Arak – i cilësuar si “joaktiv” – ishte projektuar për të prodhuar plutonium me rendiment të lartë, një përbërës thelbësor për armë bërthamore. “Sulmi shënjestroi komponentët që shërbenin për prodhimin e plutoniumit, me qëllim parandalimin e restaurimit dhe përdorimit të reaktorit për qëllime ushtarake,” thuhet në deklaratë.
Ndërkohë, IDF njoftoi gjithashtu se ka goditur një vend në Natanz, të cilin e cilëson si zonë ku po zhvillohen projekte që përshpejtojnë ndërtimin e armëve bërthamore. Izraeli pretendon se vendi përmbante pajisje unike dhe komponentë të ndjeshëm për programin bërthamor iranian.
Sulmet janë pjesë e një vale më të gjerë operacionale që përfshiu 40 avionë luftarakë dhe objektiva të shumta ushtarake, përfshirë fabrika për raketa balistike dhe sisteme mbrojtëse ajrore iraniane.
Nga ana tjetër, Irani ka përsëritur se programi i tij bërthamor është ekskluzivisht paqësor dhe i ka kërkuar Agjencisë Ndërkombëtare për Energji Atomike (IAEA) dhe bordit të saj prej 35 vendesh të dënojnë fuqimisht sulmet izraelite.
Drejtues të IAEA-s deklaruan më herët se centrifugat në Natanz janë dëmtuar rëndë ose janë shkatërruar plotësisht nga sulmet e mëparshme. Situata ka shtuar ndjeshëm tensionet në rajon dhe rrezikun për një përshkallëzim të mëtejshëm ushtarak.
