Deputeti i LDK-së, Arben Gashi, ka reaguar ndaj situatës aktuale politike në Kuvendin e Kosovës, duke theksuar se vendi ndodhet në një bllokadë serioze institucionale. Sipas tij, kjo bllokadë mund të tejkalohet vetëm në dy mënyra: përmes një marrëveshjeje të drejtë apo përmes zgjedhjeve të reja.
“Zgjedhjet janë mënyra më e drejtë, më legjitime dhe më paqësore për t’i dhënë fund kësaj bllokade të dëmshme,” deklaroi Gashi.
Ai kritikoi qasjen e partisë në pushtet, duke e cilësuar si arrogante dhe përjashtuese, e cila, sipas tij, nuk reflekton frymë demokratike.
“Nuk ka barazi. Nuk ka kompromis. Ka vetëm arrogancë. Partia që kontrollon propozimin për Kryetarin e Kuvendit, dëshiron ta realizojë qëllimin e saj pa asnjë kompromis politik,” tha Gashi.
Ai theksoi se një qasje e tillë është e papranueshme për përfaqësuesit e qytetarëve dhe shoqërinë demokratike në tërësi. “Shprehja e Kryeministrit ‘Hajt, se këta dorëzohen…’ nuk është as strategji, as vizion. Është përçmim. Dhe institucionet nuk mund të udhëhiqen me përçmim,” u shpreh ai.
Në fund, Gashi bëri thirrje për zgjidhje me përgjegjësi dhe vullnet politik: “Kur arroganca bëhet rregull – qytetari duhet të rikthehet si gjykatësi kryesor. O do të ketë zgjidhje me marrëveshje të drejtë, o le të flasë qytetari!”.
