Presidenti i SHBA-së, Donald Trump, dhe lideri kinez, Xi Jinping, pritet të zhvillojnë një bisedë telefonike gjatë kësaj jave, bëri të ditur një zyrtar i Shtëpisë së Bardhë për CNBC në kushte anonimiteti. Edhe pse telefonata nuk pritet të ndodhë sot, burimet thonë se ajo mund të realizohet “shumë shpejt”.
Kjo bisedë e mundshme ndodh në një moment kritik të marrëdhënieve tregtare mes dy fuqive botërore, të cilat janë përkeqësuar pas vendosjes së tarifave të reja nga administrata Trump. Në prill, SHBA-të vendosën tarifa deri në 145% për mallrat kineze, duke shkaktuar reagim të menjëhershëm nga Kina me kundërmasa të forta.
Ndërkohë që palët ranë dakord në maj për një pauzë 90-ditore në përshkallëzimin e masave, kjo marrëveshje duket se është në rrezik. Uashingtoni akuzon Pekinin për vonesa të qëllimshme në eksportet e lëndëve të para kritike, ndërsa Kina e cilëson qëndrimin amerikan si “provokim të njëanshëm” dhe paralajmëron për pasiguri të shtuar në marrëdhëniet dypalëshe.
Takimi i mundshëm telefonik pritet të jetë përpjekje për të shmangur një përshkallëzim të mëtejshëm të konfliktit tregtar midis dy ekonomive më të mëdha në botë.
