Numri i rasteve të dhunës në familje ka marrë përmasa shqetësuese në vendin tonë, pasi çdo ditë persona të ndryshëm përfundojnë në pranga si të dyshuar për dhunë ndaj familjarëve.
Një rast i tillë ka ndodhur së fundmi në fshatin Kotradiq të Pejës, ku një grua është detyruar të largohet nga shtëpia bashkëshortore dhe të strehohet te familja e saj, pas një incidenti të rëndë dhune.
Burimet e Gazetës bëjnë me dije se më 30 maj 2025, rreth orës 13:00, 38-vjeçarja Z.Gj. ka denoncuar në Polici se është sulmuar nga bashkëshorti i saj, Sh.Gj, 46-vjeçar. Konflikti dyshohet se ka nisur pasi ajo nuk kishte pranuar që ai të dilte me shokët, gjë që e kishte acaruar të dyshuarin, i cili më pas e kishte goditur me shuplakë në kokë.
Pas kësaj, ai e kishte marrë me veturë dhe e kishte dërguar te nëna e saj, duke refuzuar të kthehej më bashkë me të. Sipas viktimës, ajo e kishte lutur që të ktheheshin për hir të vajzës së tyre, por ai kishte insistuar që të largohej.
Prokurori i Shtetit është vënë në dijeni për rastin dhe ka udhëzuar që të inicohet procedura penale për veprën “Dhunë në familje”. I dyshuari është intervistuar dhe më pas liruar në procedurë të rregullt, ndërsa viktima është strehuar te familja e saj.
Rasti është nën hetime dhe pritet që në ditët në vijim të ndërmerren hapa të tjerë proceduralë.
