Presidenti i Ukrainës, Volodymyr Zelensky, ka zhvilluar një bisedë telefonike me kryeministrin e Shqipërisë, Edi Rama, ku e ka informuar për sulmet e fundit ruse me raketa dhe dronë ndaj territorit ukrainas.
Përmes një postimi në rrjetin social X, Zelensky theksoi se sulmet ruse tregojnë qartë se Moska nuk ka synim t’i japë fund luftës dhe se nevojitet një presion më i fuqishëm ndërkombëtar për ta ndalur agresionin.
“Diskutuam gjithashtu për bashkëpunimin me partnerët evropianë dhe mbi unitetin tonë të përbashkët”, shkroi Zelensky, duke bërë të ditur se e ka ftuar Ramën të marrë pjesë në Samitin Ukrainë-Evropë Juglindore.
Presidenti ukrainas falënderoi Shqipërinë për mbështetjen e vazhdueshme ndaj popullit të Ukrainës, ndërsa kujtoi edhe pjesëmarrjen e tij në Samitin e Komunitetit Politik Evropian të mbajtur së fundmi në Tiranë.
