Ministri në detyrë i Punëve të Brendshme, Xhelal Sveçla, ka akuzuar Serbinë për përdorimin e rastit të manifestimit të maturantëve në Mitrovicë të Veriut për propagandë.
Pas shfaqjes së një videoje të premten, në të cilën disa persona shfaqnin thirrje shoviniste dhe bënin simbolin e tre gishta, Sveçla ka theksuar se kjo propagandë ka vetëm ndikim në qarqet nacionaliste në Serbi.
“Ja si duket propaganda serbe: Kërkesën e zyrtarit policor që grupi mos të provokojë qytetarët në mënyrë që situata mos të eskalojë ata e quajnë dhunë dhe vendosjen e dorës e quajnë ngulfatje. Shfaqjet e tyre të ekstremizmit dhe shovinizmit i quajnë festë, kurse ngjyrën e kuqe me të cilën ata kanë ngjyrosur figura të ndryshme në trup tentojnë ta paraqesin si gjak. Asgjë e re nga ta!” ka shkruar ai në Facebook.
Kjo deklaratë vjen pas reagimeve të ngjarjeve të premtes, kur në veri të Kosovës dhe në Beograd u shpërndanë komente që e cilësuan incidentin si ndëretnik, ndërsa forcën e përdorur nga Policia e Kosovës e konsideruan të tepruar. Shefi i EULEX-it gjithashtu e vlerësoi të tepruar forcën e përdorur.
