Shefi i NATO-s, Mark Rutte, ka theksuar rëndësinë e forcimit të partneritetit mes NATO-s dhe Bashkimit Europian, duke vënë theksin tek siguria dhe mbrojtja, në një kohë kur kërcënimet ndaj kontinentit janë në rritje.
Përmes një postimi në platformën X, Rutte deklaroi se është i kënaqur që u takua me ministrat e Mbrojtjes së BE-së dhe nënvizoi domosdoshmërinë për rritjen e shpenzimeve dhe prodhimit të mbrojtjes.
“Bashkëpunimi NATO-BE është thelbësor përballë kërcënimeve aktuale të sigurisë. Diskutuam rritjen e shpenzimeve dhe prodhimit të mbrojtjes dhe çfarë mund të bëjmë për t’u siguruar që Ukraina të ketë atë që i nevojitet për të siguruar një paqe të drejtë dhe të qëndrueshme”, shkroi ai.
Rutte theksoi se mbështetja për Ukrainën mbetet një prioritet strategjik për të garantuar stabilitet afatgjatë në Europë.
