Kryetari i Këshillit Kombëtar Shqiptar, Nevzad Lutfiu, tha se është paraqitur në stacionin policor në Bujanoc, pasi ishte ftuar nga autoritetet serbe për protestën e organizuar më 12 gusht të këtij viti. Ai tha se arsyeja e thirrjes është vendosja e billbordeve pa leje dhe mospagimi i taksës së paraparë.
Lutfiu shtoi se procedura është ngritur nga një shkresë anonime.
“Kjo procedurë nga Prokuroria është ngritur si rezultat i një shkresë anonime, Lidhur me këtë rast nuk u deklarova për shkak që nuk është respektuar procedura e thirrjes. Gjithashtu paraqita vërejtjet e mia për mungesën e një përkthyesi të liçensuar në qytetin ku shqiptarët përbëjnë mbi 60% të popullsisë”, ka thënë ai në Facebook.
Sipas kreut të Këshillit Kombëtar Shqiptar, nga autoritetet serbe s’po ftohet “ai që kërkon zolla për ta bombarduar ndërtesën e KKSH-së”.
“Sa më i madh të jetë presioni për të na heshtur, aq më i madh do të jetë volumi jonë!”, ka shtuar ai.
Shqiptarët në Luginë të Preshevës i kanë zhvilluar disa protesta, duke kërkuar që të mos diskriminohen nga autoritetet e Serbisë.
