Banorët e fshatit Brusnik të Vushtrrisë tashmë po përballen me ditën e dytë pa energji elektrike, ndërsa deri më tani, sipas tyre, askush nga institucionet dhe kompanitë përgjegjëse nuk ka dhënë një sqarim për gjendjen e krijuar.
Banorët shprehin mllefin e tyre ndaj KEDS-it dhe KEK-ut, duke thënë se as në Vushtrri e as në Prishtinë nuk po marrin përgjigje për problemin që po i mban pa rrymë.
Ata thonë se kjo situatë nuk është problem i ri, pasi rrjeti elektrik në këtë fshat prej kohësh është në gjendje të rëndë. Përçuesit elektrikë dhe shtyllat e rrymës, sipas banorëve, janë të amortizuara dhe paraqesin shqetësim të vazhdueshëm, pavarësisht kërkesave të tyre të vazhdueshme për ndërhyrje.
Banorët ankohen se askush nga KEDS-i nuk ka dalë në terren për ta parë nga afër gjendjen, ndërsa thonë se nuk ka asnjë plan konkret për ndërrimin e shtyllave elektrike dhe përçuesve të vjetruar.
Të revoltuar nga mungesa e përgjegjësisë dhe llogaridhënies, banorët tashmë po paralajmërojnë edhe masa kundërshtuese, përfshirë ndalimin e leximit të orëve të energjisë elektrike në fshat.
Ata kërkojnë që KEDS-i të reagojë urgjentisht, të dalë në terren dhe të marrë masa konkrete për zgjidhjen e problemit, duke mos i lënë banorët të përballen me ditë të tëra pa energji elektrike.
Banorët e Brusnikut kërkojnë përgjigje: Deri kur do të vazhdojë kjo gjendje dhe kush do të mbajë përgjegjësi?
