Gjykata e Apelit e Kosovës ka lënë në fuqi aktakuzën ndaj Rozeta Hajdarit, Irfan Lipovicës, Hafiz Garës dhe Ridvan Muharremit në rastin e rezervave shtetërore. Me këtë vendim, çështja do të vazhdojë në shqyrtim gjyqësor.
Departamenti Special i Apelit njoftoi më 13 nëntor se i ka refuzuar si të pabazuara ankesat e mbrojtjes dhe ka vërtetuar aktvendimin e Gjykatës Themelore në Prishtinë, të 13 marsit 2026.
Hajdari, Lipovica dhe Gara akuzohen për keqpërdorim të pozitës apo autoritetit zyrtar në bashkëkryerje. Muharremi akuzohet se ka ndihmuar në kryerjen e kësaj vepre penale.
Aktakuza i ngarkon Hajdarin, Lipovicën dhe Garën edhe për zbulim të fshehtësisë zyrtare në bashkëkryerje. Gara përballet edhe me një akuzë të veçantë për të njëjtën vepër.
Kolegji i Apelit vlerësoi se vendimi i shkallës së parë ishte marrë në përputhje me dispozitat e procedurës penale dhe mbështetej në provat e dëshmitë që gjenden në shkresat e lëndës.
Rasti lidhet me kontraktimin e furnizimeve për rezervat shtetërore të mallrave gjatë vitit 2022.
Shënim. Të akuzuarit prezumohen të pafajshëm derisa fajësia e tyre të vërtetohet me aktgjykim të formës së prerë.
