Forca e Sigurisë së Kosovës ka njoftuar përmes një postimi në Facebook, se FSK ishte pjesë e trajnimit ndërkombëtar “Training Based on SOP – Standards of Interventions”, i cili u realizua në Slunj të Kroacisë me pjesëmarrjen e pjesëtarëve të Togut për Intervenime nga Policia Ushtarake e Forcës së Sigurisë së Kosovës (FSK).
Trajnimi është udhëhequr dhe realizuar nga instruktorë të Ushtrisë Kroate të Njësisë Kundër Terrorizmit të Policisë Ushtarake Kroate.
Gjatë këtij trajnimi bëhet e dituar se janë zhvilluar aktivitete të ndryshme praktike, me fokus në ngritjen e kapaciteteve profesionale dhe avancimin e shkathtësive në fushën e intervenimeve.
Këto aktivitete kanë mundësuar avancimin e shkathtësive taktike, shkëmbimin e përvojave profesionale dhe forcimin e bashkëpunimit ndërkombëtar.
‘Pjesëmarrja në trajnime të tilla dëshmon përkushtimin e FSK-së në ngritjen e vazhdueshme të profesionalizmit, gatishmërisë dhe kapaciteteve operacionale të pjesëtarëve të saj.’, ka shkruar në njoftim FSK.
