Shkruan: Faton RAMADANI
Sot u drejtohemi të gjithë deputetëve të Kuvendit të Kosovës me kërkesën që njëri prej jush, me vullnet dhe përgjegjësi, ta marrë përsipër ngritjen e kësaj çështjeje në Kuvend dhe të kërkojë nga organet kompetente hetimin e plotë të dyshimeve që dalin nga materialet që kemi siguruar.
Fadil Demakut dhe Altin Krasniqit ua dhamë shtatë ditë kohë për të shprehur gatishmërinë për këtë iniciativë. Afati ka përfunduar. Deri më tani, nuk kemi marrë përgjigje dhe nuk jemi njoftuar për ndonjë veprim nga ana e tyre. Meqenëse ata nuk e ndërmorën këtë hap, kërkojmë që një deputet tjetër ta marrë përsipër këtë iniciativë.
Fadil Demaku, sipas vlerësimit tonë, kishte edhe një arsye më shumë për të kërkuar zbardhjen e këtij rasti: sipas interpretimit tonë të raporteve që kemi siguruar pas 24 vitesh, emri i tij përmendet në lidhje me vrasjen e familjes Hajra. Kjo përmendje nuk përbën provë fajësie, por kërkon sqarim nga organet kompetente. Zbardhja e plotë e së vërtetës është në interesin e tij dhe të publikut.
Në një shkresë të avokatit që disponojmë, qëndrimi i atribuar Fadil Demakut e paraqet këtë rast si të përfunduar. Por, për familjen tonë, pyetjet mbeten pa përgjigje, ndërsa materialet që kemi siguruar kërkojnë shqyrtim. Për ne, ky rast nuk mund të konsiderohet i mbyllur pa u zbardhur e vërteta.
Nga Altin Krasniqi prisnim ndjeshmëri dhe angazhim, duke pasur parasysh përvojën e familjes së tij me padrejtësinë. Nuk e dimë pse nuk ka reaguar. Dimë vetëm se kërkesa jonë ka mbetur pa përgjigje.
Pas 24 vitesh kemi siguruar materiale që, sipas vlerësimit tonë, ngrenë dyshime serioze për fshehje ose mosshqyrtim të provave, si dhe për mbulimin e autorëve të vërtetë të krimit. Këto dyshime kërkojnë një hetim të plotë, të pavarur dhe të paanshëm.
Deputetë të Kuvendit të Kosovës, kërkesa jonë është konkrete:
- Një deputet ta marrë publikisht përsipër iniciativën për ngritjen e këtij rasti në Kuvend.
- Të kërkohet nga organet kompetente hetimi i dyshimeve për fshehje, ndryshim apo mosshqyrtim të provave.
- Të kërkohet llogaridhënie institucionale dhe të jepen përgjigje të arsyetuara për shqetësimet tona.
Nga të zgjedhurit e popullit presim angazhim konkret. Familja jonë ka kaluar 24 vjet në pritje, dhimbje dhe përpjekje për të siguruar dokumentet dhe për të kërkuar drejtësi.
Ne do të vazhdojmë të kërkojmë shqyrtimin e çdo prove dhe përgjigje për çdo mospërputhje. Kush prej jush është i gatshëm ta marrë përsipër këtë iniciativë?
24 vjet janë shumë. Heshtja nuk e mbyll këtë padrejtësi. Kërkojmë të vërtetën dhe drejtësi!
