Dy shtetas shqiptarë, të moshës 47 dhe 49 vjeç, janë arrestuar nga Policia Kantonale e Cyrihut, pasi dyshohet se tentuan të hynin me forcë në dy shtëpi në Horgen të Zvicrës.
Ngjarja ka ndodhur të mërkurën mbrëma, më 28 tetor 2026, në lagjen Mühlebach, ku hetuesit e Policisë Kantonale të Cyrihut vunë re tre burra që po lëviznin në mënyrë të dyshimtë në atë zonë.
Sipas policisë, pas orës 19:30, tre personat fillimisht tentuan të hynin me forcë në një shtëpi të izoluar, por pasi nuk ia dolën, u drejtuan drejt një prone tjetër.
Pikërisht gjatë tentimit për të hyrë në pronën e dytë, policia arriti ta arrestonte njërin prej tyre. Bashkëpunëtori i tij u kap gjithashtu pas një ndjekjeje të shkurtër në këmbë, ndërsa personi i tretë, i cili dyshohet se kishte rolin e vëzhguesit, arriti të largohej dhe t’i shpëtonte arrestimit.
Dy të arrestuarit kishin me vete mjete për vjedhje me thyerje, veshje mbrojtëse dhe radio komunikimi.
Pas arrestimit, dy shqiptarët u dërguan në një stacion policor për procedura të mëtejshme, ndërsa më pas iu dorëzuan Prokurorisë Publike.
