Policia e Kosovës ka gjetur dhe sekuestruar armë, municion dhe një sëpatë në shtëpinë e Albert Sylajt, i dyshuar për vrasjen e Arlinda Zekajt në Pejë.
Sipas raportit 24-orësh të Policisë, kontrolli është kryer të dielën mbrëma, më 25 tetor, në fshatin Vitomiricë të Pejës.
Gjatë kontrollit në shtëpinë e të dyshuarit janë gjetur një pushkë gjuetie, 153 fishekë, disa karikatorë, disa pajisje të armës, tri thika, një bajonetë, 115 gëzhoja dhe një sëpatë.
“Rasti është duke u hetuar”, thuhet në njoftimin e Policisë.
Albert Sylaj dyshohet se të dielën mbrëma e vrau me sëpatë ish-kunatën e tij, Arlinda Zekajn, disa minuta pasi ajo ishte kthyer nga stacioni policor.
I dyshuari vazhdon të jetë në kërkim të Policisë së Kosovës.
Policia ka kërkuar bashkëpunimin e qytetarëve për informacione që mund të ndihmojnë në lokalizimin dhe arrestimin e tij.
