Shkruan Ismet HAZIRI
Jam pjesë e LDK-së dhe pikërisht për këtë arsye nuk mund të hesht kur shoh qasje që, sipas meje, nuk përputhen me vizionin e një partie që duhet ta çojë Kosovën drejt Evropës, demokracisë dhe shtetit të së drejtës.
Është e papranueshme që deputetët, të cilët qytetarët i kanë zgjedhur për të bërë ligje, të japin përshtypjen se merren me zgjidhjen e çështjeve që duhet t’i trajtojnë institucionet e drejtësisë, përmes odave të burrave dhe mexhliseve.
A janë zgjedhur deputetët për të hartuar ligje, për ta reformuar sistemin e drejtësisë dhe për ta bërë shtetin funksional, apo për t’u kthyer në ndërmjetës të rasteve të veçanta, sikur të mos ekzistonin Policia, Prokuroria dhe Gjykatat?
Nëse deputetët, në vend se ta forcojnë drejtësinë institucionale, përfshihen në procese që krijojnë përshtypjen se drejtësia zgjidhet përmes ndikimit personal, atëherë kemi arsye serioze të pyesim: për çfarë na duhen institucionet?
Kjo është pikërisht ajo që duhet të na shqetësojë si qytetarë dhe si anëtarë të LDK-së.
Ne nuk i kemi zgjedhur përfaqësuesit tanë që të sillen sikur janë mbi institucionet, por që të krijojnë kushte që institucionet të funksionojnë pa pasur nevojë për ndërhyrjen e tyre. Detyra e deputetit është të bëjë ligje të mira, të kërkojë llogaridhënie, të mbrojë pavarësinë e drejtësisë dhe të sigurojë që ligji të vlejë njësoj për të gjithë.
Jo të bëhet vetë mekanizëm për zgjidhjen e çështjeve që kërkojnë trajtim institucional.
Le të jemi të qartë: nuk kemi asgjë kundër traditës, odave të burrave apo vlerave tona kulturore. Por tradita është një gjë, ndërsa drejtësia shtetërore është diçka krejt tjetër. Pajtimi dhe dialogu mund të kenë vendin e tyre, por nuk mund të zëvendësojnë procedurat ligjore dhe përgjegjësinë e institucioneve.
Nuk mund të flasim për integrim evropian, ndërsa në praktikë të sillemi sikur shteti modern duhet të funksionojë me mekanizmat e së kaluarës.
Në kohën kur bota po përparon në shkencë, teknologji dhe zhvillim, ne nuk mund ta masim modernizimin vetëm me fjalime politike, ndërsa për çështjet e ndjeshme të vazhdojmë të mbështetemi te ndërmjetësimi i individëve. Kjo nuk është rruga drejt një shteti të zhvilluar. Është rrezik që të na mbajë peng të një mentaliteti të vjetër, ku autoriteti personal shihet si zgjidhje aty ku duhet të veprojë ligji.
Shteti nuk mund të ndërtohet mbi logjikën: kur institucionet nuk na mjaftojnë, le t’i zgjidhim punët në mexhlis! Shteti ndërtohet duke i bërë institucionet aq të forta, sa askush të mos ketë nevojë të kërkojë drejtësi përmes ndikimit politik apo personal.
Si anëtar i LDK-së, dua të di: a është ky vizioni ynë politik? A duam të jemi parti që ndërton institucione moderne, apo rrezikojmë të japim shembullin e kundërt, duke i orientuar qytetarët drejt mekanizmave që shteti duhet t’i tejkalojë?
LDK-ja duhet të jetë parti e ligjit, e përgjegjësisë dhe e standardeve evropiane. Deputetët tanë duhet të jenë në Kuvend duke propozuar ligje, duke kërkuar reforma dhe duke luftuar për një drejtësi të pavarur, jo duke krijuar përshtypjen se zgjidhja e problemeve varet nga ndërhyrja e tyre.
Nuk kemi nevojë për politikanë që bëhen të rëndësishëm duke ndërmjetësuar raste të veçanta. Kemi nevojë për politikanë që ndërtojnë një shtet ku çdo qytetar ka të drejta të barabarta dhe ku askush nuk është aq i fuqishëm sa ta zëvendësojë ligjin.
